PYF HRUAIAWKNAK IH ZUAM-NGIARTU
By |a Hniang Uk
Tuini ih kan dinhmun in hmailam ih kan sinak ding a fiangter. Tuini ih kan tuah\uan mi hin hmailam ih kan sidan ding cu a si. Kan Synod huap PYF kaihhruaiawknak hi a liamcia kum 10 lai dinhmun thawn vun khaikhin tikah kan \hansonak hi hmuh ding a tam lo nasa. Neih thilri lam ahcun kawhhran in a neih ding tawk thilri le instrument pawl cu kan nei \ha zet ko. Asinan a minung lam ah hin kan \umsuk ih, neih thilri hmang thiam awtu khal kan um mumal lo. |hansonak tahfung ngaingai cu thil le ri parah siloin minung dinhmun sawn ah hin a si. Kan kaihhruaiawk dan (leadership sytle) ah hmabak mi tampi kan nei lai. A hleice in tuvek ih santiluan thleng danglam cak zet karlak ahhin kan kaihhruaidan a hnufual lo ding a thupi zet. Biaknak lam telin, pawlkom pakhat \hangso ding cun kaihhruaiawknak hi a thupibik mi cu a si. Tuini ih kan dinhmun zoh rero tikah hmailam ih kan sinak ding hi ruah a har zet \heu. Mai helhkamnak zawn run phorhsuak in PYF kaihhruaiawknak ih kan hmabak (tiih ka ruah mi) hrekkhat kan run hai lang tum ding.
1. Milai hrambun Vision nei kaihhruaiawknak: Daan ngai thupi zet kawhhran kan si vekin, PYF khalin Handbook ih kaihhruaiawknak cu kan ngai thupi thiam zet. Asinan, hmailam can ra her vivo ding mi hrang timtuahawknak lamah hmathlir(vision) nei ih kaihhruaiawk lam ahcun ngai thupit mi kan nei tuk lo a bang. Handbook le daan bu lawng hi \hansonak dingih kaihhruaiawknak ah a rak tawk lo. Kum thok ih Branch meeting-nak ah kum khat tumtah cu kan nei cio \heu ko. Asinan cumi ih kan tumtah cu thilri lam thotho hi a si tlangpi \heu.
Kan tumtah dingih thupi sawn cu a minung thotho hi a si. Milai \hansonak ding hi kan hmuitin mi kan vision a si camcin a thupi. Kan Bawipa Jesuh in a dungthluntupawl hnen ih thu a cahmi netabik khal ‘milai/minung’ hnen ih va feh/thlen ding thotho a si. “Curuangah feh uhla miphun hmuahhmuah ka dungthluntu va siter uh…” (Mat 28:19) tiin Jesui’ thucah kan hmu thei. Jesuh ih mission bik khal milai rundam ding a si vekin, dungthluntupawl khal cui milai hrang a hnatuan pehzom dingin a cah a si. Cucu tuini kawhhran le department tin ih kan tumtah bik ding khal a si fawn. Milai hrambun ih tumtah nei ih hna kan \uan lo a si ahcun \hansonak ngaingai zianghman kan nei zik lo. Kawhhran department pawl hin milai \hansonak ding hrang hna\uan loin, sumpai hawl le tlanghna tivek hrawng lawngah kan buai deuh tuk lai a bang. Cuhnakin milai thahrampi \hanlennak hmuitin in Khrih ih rian kan sunzom vivo sawn ding hi a si.
2. Pacang no pawl PYF rawngbawlnak ih tel: PYF member cu kum 14 – 35 (kum 40 tiang khal a si thei) tiin kan daan bu ah a um ko nan, branch tam sawn PYF member dinhmun kan zoh tikah kum 14-25 tiang hi kan tam sawn. kum 30 tlun lam branch ah active zetih cangvai lai pawl cu zatek pahra hrawng lawng an si. Himi hi a \hatnak a um rualrualin PYF \hansonak dawnkhamtu pakhat cu a si rori. Ziangahtile kaihhruaiawknak ah tonteh neih tam hi a thupit vekin, hmuar nei zetih kaihruaiaw thei ding cun pitling lai rero pawl hnakin pitling cia pawl hi hruaitu an si a rak \ul \heu. Lairelnak khalah kum no tuk lai pawl hrangah thu \ha thawh hi a rak ol lo, cangvaihnak tinkim khal ah cutin a si vivo. A hleice in Chin Synod ah pacang no pawl in \halai cangvaihnak an thlahthlam vivo hi kan nunphung pakhat vekah a cang tum si in a lang (a hlecei in hmunpi lam ah). Kum upa hlir hruaitu an si ding khal a \ha loih, kum no tuk hlir khal hruaitu an si a \ha \heh lo ruangah cawkrual aw tawk sehla duhthusam a si. Asinan tui kan dinhmun ah kaihhruai \ul mino member pawl cu hruaitu dinhmun ih an hung si tikah hruaiawkdan a vaivuannak a tam thei zet. Mino hleremnak khalah bass aw hman nei hrih lo pawlin an vun rem tikah hla a mawi thei lo vekin, kaihhruaiawknak khalah a baibah deuh \heu.
Synod hrekkhat ahcun an mino pawl an hraw teptep thei zetih, kum lam khalih pitling zetzet pawl hmuh ding an tam zet lai. Cuitlun ah pavalai group tiin kawhhran ah department pakhat a ding fel bet ih, cumi ah pacangno pawl in kawhhran nasa takin an rian. Chin Synod ahcun cuvek kan um thei hrih lo hi kan hnufualnak ding teh a si pang pei maw ti vun ruah tinten hnak a doh duh zet \heu. Tonteh nei \ha zetzet, thudung le thuhmai thlir thiam pacangnopawl kawhhran \halai cangvaihnak an thlahthlam vivo hi cu a poi tuk lawmlam. Anmai hrang khalah kawhhran ah le covo nei laklawh lo, mino le \halaipawl lakah le tel paih laklawh lo dinhmun ah an ding ih, Sunday sun kawhhran biakkhawmnak ih tel lawng hi kawhhran ih an langnak umsun ah a cang. Hi thil hi hitin kan som vivo a si ahcun nunphung \ha lo tak kan somnung vivo tinak cu a si ding. Ziangtin hma kan la peh vivo ding timi cu tuini kawhhran huap in ngiar zettu a si.
3. PYF Dinsan tlamtlinter: Pawlkom pakhat a ding a si ahcun dinsan an nei ringring. Dinsan le tumtah nei loin ziang pawlkom hman a ding dah kel lo. PYF khalin dinsan 5 kan nei (a hlan ah 10 kha 5 ah tuahrem a si zo). Dinsan ti a si vekin kan kaihhruaiawknak ah kan dinsanpawl ti tlamtlinter ding hi PYF ih kan tumtah dingmi thil a si. Ziangvekin kan kaihruaiaw ding timi thu sutawk ciamco a \ul lo. Dinsanpawl tlamtlinter dingih hmalak hi kan hruaiawk dan ding cu a si mai. PYF Dinsan 5 khal hi, member \hansonak dingih thil thupi zetzet an si.
PYF dinsan 5 cu:
1. Thuthang\ha phuandarh
2. Kawhhran kutke si dingih timtuahawk
3. Pathian thu le hla ih \hanso
4. Khristian nundan mawi langter
5. Mi pitling sersuah
PYF hruaitupawl cun hi kan dinsan tlamtlingter dingin ziangtin hna kan \uan timi cu kan thusuhawknak ding bik a si. Khuimi zawn ah kan tlaksam? Ziangtin ha \an kan lak sinsin thei ding? Kan dinsanpawl kan hlensuak vivo ahcun kan rian\uannak in rahsuah \ha tampi a nei tengteng ding.
4. Sersuahawknak le Tat-hriamawknak lam ah: A pakhatnak ih kan relmi vun pehzom sal sehla; member \hansonak hrangih hma kan la ngaingai ding a si ahcun, sersuahawknak program: campaign, crusade, seminar le training vek a phunphun hi kan uar a \ul rori a si. Khrih ih rian sunzomtu kan si vekih a pakhatnak ah kan memberpawl Khrih rundamnak an co ih, Khrih dungthluntu \ha an si theinak dingih sersuahawk hi kan hmuitin dingbik cu a si. Sikhalsehla PYF rawngbawlnak ahhin, himi hi kan tumtah dah lo a bang. PYF ih hmalaknak thawn campaign le crusade tuah khal hi kan um dah lo a bang. Minopawl in rundamnak an ngah theinak ding a si ahcun sumpai tampi cem ih tuah ding hman hi a phu zet a si. Kan minopawl kumkhaw nunnak an ngah ih Khrih dungthluntu \ha si dingih sersuahawk tlukih \uanvo thupi sawn hi a um zik lo.
Cuvek thotho in tuvek ih santiluan cak zet karlak ah minopawl hin training a phunphun kan uar khal a \ul. Kum khat ah a malbik vei 3 tal training neih hi tumtah ringring ding a si. Apoi zet cu kawhhran hruaitu kan pa le pawl hin training an uar lemlo ruangah minopawl khalin training \ul kan ti lo vivo si in a lang. Kan sumpai hawlmi cu rawngbawlnak ah le training-nak ah a tambik hmang thei sehla mino \hansonak tampi a thlen tengteng ding. Training-nak hrangah sumpai hi ui hlah uhsi, cuti lo cun kan minopawl hi kan tat-hriam lo dah pang kei. A hleice in leadership training hrimhrim hi cu zo cio khalin kan neih \heu a poimawh a si. Cuitlun ah santiluan thawn a mil aw mi training a phunphun: music(solfa) training, kuthiam thil zirnak a phunphun, sumpai peipundan, business le management, tivek training a phunphun zir ding tampi a um. Hmailam ih kan kawhhran hmuihmel hung si vivo ding kan minopawl a \habik ih kan ser theinak dingah Pathian thutak zin ih mino kaihhruai le training a phunphun kan tuah \heu a \ul a si.
5. Santiluan zoh ih kekar thiam: Himi zawn ah media hman \angkai thiam ding hi kan rel tumbik mi cu a si. Kan san hi IT san a si vekin, pehtlaihawknak a rang zet thlang ih internet hi zo cio khal kan kutzaphak in kan hum thei thlang. A hmang thiampawl cun a rahsuah tampi an tel rero zo. Kawhhran department khalin hi thil hi kan hman \angkai thiam a thupi zet. Covid-19 ruangah kawhhran huap kan cangvaihnak ah nunphung pangai vekin thil kan tuah thei lo nan, hrekkhat cun media hmangin pehzomawknak cat loin an nei ringring. “Zoom” hmangin Pathian thuih pawlkomnak an nei thotho. Culawng siloin facebook, Youtube tivek social media pawl hmang khalin Thuthang\ha phuannak an nei peh thotho. Kan san khalin a zir zet ruangah kan hman thiam a poimawh ve zet a si. A minung ih pehtlaihawk a theih lo tiin puhmawh kan hawl men thei nawn lo, kan kut ih kan hum ringring mi phone hmangin kan meeting thei ringring. Cuitlunah internet hmangin, Pathian thu thawn pawlkomawknak le rawngbawlnak a phunphun kan sunzom thei thotho a si. PYF branch tin hin facebook group/page, youtube channel, messenger/whatapp/viber group tivek a phunphun khal kan pehzomawknak ah kan hmang \angkai vivo ding a si.
A netnak ah, PYF ih moto: “Riantu si dingih kawhmi” ti a si vekin Khrih ih rian hi kan hmuitinbik ding mi cu a si. Cumi umzia cu kan milaipi kan rian ding hi a si. Cumi cu kawhhran le department tin ih kan tumtah bik ding mi khal a si. Kan rian mi Pathian ih fahiangpawl taksa, thinlung, thlarau lam ih an \hanso theinak dingah kan ti theitawkin hma kan la a si ahcun Khrih ih rian sunzom theitu kan si ding. A tlun ih kan tarlan mi thil-5 pawl hi tui kan dinhmun ih in zuamngiartu le PYF hmakhua a thlirtu pakhat dinhmun ih mino kan \hansonak dingih kan hmabak tiih ka ruah mi khal an si. Jesuh Khrih in Peter cu a dungthluntu dingih a kawh tikah ‘nga’ kaitu dinhmun ihsin ‘milai’ kaitu ih a tuah bangin, ‘nga’ hnakih thupi sawn milai rori Jesuh Khrih hrangih kai ngahtu kan si theinak dingah hruaitu kan zaten thlacamnak nasa zet thawn \an la sinsin uhsi.